السادة الزملاءالافاضل :
أهنئكم ببداية العام الدراسي الجديد كل عام وانتم بخير ويارب يكون عام افضل من سابقيه وربنا ييسر لنا الاحوال
مع بداية اول يوم دراسة والبعض منا جديد يدخل المكتبة لاول مرة علينا عمل الاتي اول يوم دراسة :-
1. نبدأ يومنا ببسم الله الرحمن الرحيم ودعاء اللهم لاسهل الا ماجعلته
سهلا وانت تجعل الصعب سهلا ان شاء الله
2. اول عمل هنعمله نفتح سجل المترددين ونكتب التاريخ واليوم ونسجل اسمنا في الدفتر ( عارف ان البعض هيعترض ويقول ليه نسجل اسمنا احنا موجودين كل يوم وده عملنا ) هو سجل المترددين واحنا مترددين علي المكتبة ولو دخل المدير او متابع سجل اسمه ايضا وفي سبب الزيارة اكتب متابعة العمل في المكتبة
3. تاني عمل اعمله استلمت جدول الحصص بتاعك هات ورقة ارشيف او لوحة بريستول نص او ربع فرخ او الافضل كرتونة نتيجة واستخدمها من الظهر الجزء الابيض وسجل عليها الجدول بتاعك وعلقها في مكان ظاهر لاي حد داخل المكتبة
4. تالت عمل لو ماكنتش عامل اجتماع للجنة المكتبة قبل الدراسة بيوم او يومين اعمل محضر اجتماع وسجلة بتاريخ قبل الدراسة ( موجود عندك بالجروب ) ماتسمعش كلام حد يقولك اول اجتماع للجنة المكتبة لازم يكون في شهر سبتمبر لانه مش طبيعي اعمل لجنة المكتبة قبل الدراسة ب40 يوم الاوقع تتعمل في اول اكتوبر
5. رابعا حضراول دروس لحصة المكتبة للصفوف اللي بتتعامل معاها وجهز سجل حصة المكتبة لان المتابعين بيهمهم التحضير
6. خامسا المفترض ان حضرتك عامل سجل الخطة العامة من قبل ومظبط السجل ابدأ فرغ خطة شهر اكتوبر وموجودة عندك بالجروب
7. سادسا روح لقسم ال300 اسحب منه كتب تلوث البيئة واعمل معرض البيئة الدائم والمعرض ده بيستمر طوال العام
8. سابعا بعد ماتفطر وتشرب الشاي لو مش عندك حصص من اول يوم من الممكن تحضر بعض السجلات زي الاذاعة وياريت اول برنامج عن نصر اكتوبر او اذاعة بدء العام الدراسي وموجودين ايضا بالجروب وسيبها من غير تاريخ لغاية ما ييجي يوم للاذاعة
9. لو كنت مانزلتش الجرد تقدر تنزله وتشطبه قبل زحمة الحصص
10.ختم سجلاتك ورقمها وحضر اللي ناقص منها وحضر ندوة او محاضرة بس من غير تاريخ
واخيرا اعانكم الله وسدد خطاكم ووفقكم لما فيه الخير
مع تمنياتي بالتوفيق للجميع
يوسف ابوالعباس