كيفية ادارة حصة مكتبة المرحلة الابتدائية

كيفية ادارة حصة مكتبة
المرحلة الابتدائية
1 - تقسيم التلاميذ الي صفين (بنات ، بنين )
2 - نبدأ ندخل صف البنات اولا بعد ترك الحقيبة خارج المكتبة ، ثم ندخل صف البنين ، مع وجود نوع من الحزم في التزام كل تلميذ بمكان معين اشير اليه بالجلوس فيه ( يعني بقعد واحد واحد حسب مابشاور )
3 - القي السلام علي الاولاد وعلمهم ان يلتزموا بالرد جميعا في وقت واحد بالسلام كاملا ليأخذوا ( 30 حسنة )
4 - رحب بالتلاميذ في مكتبتهم وابدأ حدثهم عن اداب المكتبة ( كل حصة ) حتي لو مش مكتوبة في المنهج واسأل فيها
5 - تحدث عن تعريف المكتبة واهميتها واهمية القراءة وعرفهم الفرق بين من يقرأ ومن لا يقرأ
6 - اثناء شرح المنهج وهو مادة جافة لا اثارة فيها تجذب الطفل
اربط شرحك دائما بأمثله علي حياة التلميذ مثال : ولد بيتكلم اثناء حديثك
لا تنهره ووجه حديثك لباقي الاولاد سائلا : ينفع ياحلوين بابا يكون بيتكلم واحنا مانسمعهش ؟
او مثلا : ينفع احنا قاعدين في مسجد يوم الجمعة والخطيب بيتكلم واحنا نقعد نتكلم او ناكل مثلا ؟
بعدها التفت الي الطالب وقوله ينفع ؟
ايضا اثناء الشرح ضيف من عندك بعض الفكاهه الي الموضوع
لا تسترسل في الحديث متناسيا ضعف التركيز لدي الاولاد لانهم بطبيعة الحال بيفقدوا التركيز سريعا ( بالعربي ماتبقاش زي الراديو شغال وخلاص ، اعمل واقفات
7 - اتحرك اثناء الشرح في ارجاء المكتبة ، لا تقف في مكان واحد ، حتي تشغل التلاميذ بحركتك وعينيهم تبقي معاك كل شوية تقرب من مجموعة ،
8 - بعد شرح جملة او اتنين اطلب من الاولاد ان يعيدوا الكلام حتي يسمعوه من غيرك ( نوع من التكرار )
ولكن طريقة السؤال كالتالي : ( الطريقة السليمة )
اسأل السؤال اولا ثم اطلب من الاولاد الاجابة
واياك ان تطلب من تلميذ الوقوف ثم توجه له السؤال
حتي لوعارف الاجابة مش يعرف يجاوب
9 - اسأل مرة ولد ومرة بنت وقولهم هنشوف مين الاشطر البنين ولا البنات
10 - بعد نهاية شرح المنهج في ابسط صورة اطلب من الاولاد دقيقة او اتنين صمت وعرفهم لو اتكلمتوا مش هنقرا قصص ( مبدأ الثواب والعقاب )
11 - احضر قصة مثيرة شيقة (مثلا الفيل فرفور) اطلب من الاولاد التركيز ابدأ بقراءة العنوان ، اقفل القصة ، وابدأ اعمل عصف ذهني للاولاد
( النهاردة ياأولاد هنقرا مع بعض قصة الفيل فرفور ، مين شاطر يقولي الفيل ده حيوان ولا طائر؟
عايزين نتفق الاول ان ماحدش يقول أنا ، اللي عارف يرفع ايده ،وكمان مرة ولد ومرة بنت ، اتفقنا ياشباب !
ولد او بنت هيقوم يجاوب ، هيقول صح او غلط ، لا تبدي اي اندهاش للاجابة ولا تعرفهم صح ام خطأ ، دع الاولاد يعرفون بنفسهم الاجابة الصحيحة .
اسأل تاني الفيل بيعيش فين مين يعرف ؟
الفيل بياكل ايه ؟
الفيل بيعيش فين ؟
مين منكم شاف الفيل ؟
طب مين فيكم اشطر يقولي لو اخوك الصغير في البيت سألك ايه الفرق بين الطيور والحيوانات تقوله ايه ؟
طب ايه رأيكم احنا هنعمل السؤال ده مسابقة !
عايز سكوت علشان اعرف اتكلم ، علشان لو سمعت صوت هاقفل القصة ومش هاكمل وترجعوا الفصل.
عاوزاقسم مجموعات كل ترابيزة مجموعة ونختار لها اسم ،وبعدين كل مجموعة تقول اجابة واحدة
ونعرف مين الي اجابته صح ونصفق للشاطر
- لاحظ انك اخذت وقت كبير من الحصة وانت لسه في العنوان .
بعد جمع الاجابات اطلب اذكر الاجابة الصحيحة اولا
وبكده الكل عرف اجابته صح ولا غلط
- ارجع الي القصة ابدأ القراءة توقف من وقت الي اخر ، اسأل عن اللام الشمسية واللام القمرية ، اسأل عن كلمات بحرف ال( الميم )
واطلب من البنات مرة ومن البنين حرف اخر للصفوف الصغيرة ( اولي ، تانية ، تالتة )
واطلب مثلا ( استخراج الافعال ، حروف الجر ، وايضا اللام الشمسية والقمرية ) للصفوف الكبيرة ( رابعة ، خامسة ، ستة ) وكالعادة لا تقول صح او خطأ ودع الاولاد يعرفون الاجابات من نفسهم
- اطلب من الاولاد التركيز في الصورة في القصة لمدة دقيقة ، اغلق القصة اسأل الاولاد كام ولد في الصورة ؟ أو ماذا ترتدي البنت في يدها (اختبار قوة الملاحظة ) اللي يجاوب صح اطلب منه يقول اسمه وخللي الاولاد يصفقوا له ( تشجيع معنوي )
تأكد ان هذا الموضوع سيجعل الكل يركز في القصة ، بدليل عندما توجه سؤال اخر ثق تماما ان الاجابه ستكون صحيحة
اطلب من الاولاد التصفيق لانفسهم لانهم شطار
- اثناء القصة توقف واطلب منهم توقع النهاية ، واسأل عدد كبير منهم ( وكالعادة ) مرة ولد ومرة بنت ، ارجأ الاجابة لحين انتهاء القراءة ، وعندها سيعرف كل تلميذ الاجابة بنفسه
- اطلب من التلاميذ اهم الدروس المستفادة .
اشرح كل نقطة علي حدا ، واذا كانت هناك قصة الدروس منها قليلة ، وصعب عليك حتي استخراج درس منها ، فيكفي ان القصة امتعتك وهذه في حد ذاتها فائدة وهي المتعة من القراءة
- بعد الانتهاء من القصة اختار اي موضوع من موضوعات الساعة (المحاضرات ، الندوات ) وابدأ التحدث فيه بأسلوب يتناسب والمرحلة العمرية اهم ما يميزه البساطة ، الوضوح ، البعد عن الالفاظ الصعبة .
- علم اولادك شئ ينفعهم في حياتهم بعيدا عن السجلات المتفبركة ، علمهم سلوكيات ، ادب ، دينهم ، الصلاة ، الوضوء ، الامانة ، الصدق ، الخير والشر ، مساعدة المحتاج ، ازرع فيهم الصفات الحميدة ، البعد عن ايذاء الغير ، اخلص في عملك لله مع الاولاد وهذا ما سيتبقي لهم من شغلك لا هينفعهم سجلاتك ، ولا اوراقك ، سيظل معهم طيب كلامك ، وعظيم اثرك ، وستنال جزاءك من الله عندما تسأل عن علمك ( ماذا عملت به وفيما استخدمته )
لو 5 اولاد من كل فصل استفادوا من كلامك وعملوا به سيوضع في ميزان حسناتك يوم القيامة وهو حسنة جارية لك
واخيرا : اللهم علمنا ما ينفعنا وانفعنا بما علمتنا